Azaroan bete-betean sartuta gauden arren, eguzkia jaun eta jabe izan da gaur egun guztian. agian horregatik daude maindireak, kuleroak eta kolore guztietako arropak nonahi zabalduta. Nagusi kaleko guztiak ados jarri dira gaurko egunean arropak kanpoan zabaltzeko. Eskuinetara doan kalean sartu naiz. Hemengo batzuk ere jarri dute dagoeneko garbigailua. Nik ere horixe egingo dut etxera heltzen naizenean. Eta zer prestatuko dut afaltzeko? Etorkizunari begira egoteak ez dit uzten oraina dastatzen. Uste dut oraindik baditudala leka batzuk hozkailuan. Errepidea gurutzatu dut. Afalostean gitarra jo dezaket, eta musika entzun, vals bat adibidez, Shostakovichen bigarrena, bat-bi-hiru, bat-bi-hiru… Seguruenik mundua hobea izango litzateke kantua aterako balitz jendearen ahotik hitzen ordez; gehiegitan eteten dituzte hitzek momentu bereziak.
− Aio, politt hori!
Nire mutil-lagun ohiaren ahots sendoa izan da gaurkoan.
Elixabet
Berbaratza 