Urte oso baterako errezeta

Katharina Elisabeth Textor (1731-1808)

Izenez ez da oso ezaguna, ezkontzean hartutako abizenagatik, ordea, bai: Goethe. Johann Wolfgang von Goethe idazle, zientzialari, historialari -eta beste hainbat izenondodun gizon- ospetsuaren ama izan zen, Aja andrea izenez ere ezaguna. Emakume ezin argiagoa zen, nortasun handikoa eta guztiz alegera. Argi ikusten da hori semeari eta lagunei idatzitako ehundaka eskutitzetan; baita semeak hari buruz egindako ezin konta ahala aiputan ere.

Gaur emakume honen eskutitzik ez, baina bere errezeta bat ekarri dugu Berbaratzara. On egin!

URTE OSO BATERAKO ERREZETA

Hartu hamabi hilabete,

ondo-ondo garbitu

samina, zekenkeria, pedantekeria eta beldurra kentzeko

eta zatitu hilabete bakoitza 30 edo 31 zatitan,

doi-doi urtebete hornitzeko lain.

Egun bakoitzak hiru osagai izango ditu,

lan zati bat

eta poz eta umore zati bana.

Horri goraino betetako hiru koilarakada baikortasun gehitu,

koilarakadatxo bat tolerantzia,

ironia apur bat

eta sotiltasun pitin bat.

Orduan nahastura maitasunez ondo busti.

Jakia gertu dagoenean

adeitasun sortatxo batez apaindu

eta zerbitzatu egunero patxadarekin

eta katilu on bat te indargarriz lagunduta.

Ainhoa